Ауыр атлетикадан Азия чемпионатында Қазақстан қоржынына 6 алтын, 3 күміс, 3 қола медаль түсті

Сары құрлық бәсекесінде 25 елден 300-ден астам атлет бақ сынауда. 10-шы шілдеге дейін жалғасатын дүбірлі додада ел намысын 36 спортшы қорғап жатыр. 17-20 жас аралығындағы қатысушылар ауыр атлетиканың классикалық жаттығулары – жұлқа және серпе көтеру түрінен бақ сынасады. Жеңімпаздар жекелеген жаттығуларда да, қос сайыстың жалпы қорытындысы бойынша да анықталады.

Үшінші жарыс күнінде Әлихан Әскербай (71 келіге дейінгі салмақ дәрежесінде, U17) қоссайыс нәтижесінде 310 кг (141+169) зілтемірді бағындырып, жеңіс тұғырының ең биік сатысына көтеріліп, әлем және Азия рекордын жаңартты. Дәл осы салмақта тағы бір отандасымыз Ернұр Мырзахмет жұлқа (131 кг) және серпе көтеруде (152 кг) күміс пен қолаға ие болды.

Сондай-ақ 15 жастағы аруымыз Ксения Прозорова жасөспірімдер арасында қоссайыстың қорытындысы бойынша 194 кг (89+105) нәтижемен Азия рекордын жаңартып, үздік атанды. Сондай-ақ жастар арасында (U20) серпе көтеруде кіші қола, ал жұлқа көтеру мен қоссайыста күміс жүлдеге қол жеткізді.

Бейбарыс Ерсейіт (65 келіге дейінгі салмақта, U17) серпе көтеруде 145 келіні еңсеріп, кіші қоланы алды.

Қазір Қазақстан құрамасының қоржынында 6 алтын, 4 күміс, 6 қола медаль бар.